Bankların dolların satışı ilə bağlı məhdudiyyəti davam edir. Fins.az-ın məlumatına görə, bəzi banklar dollar və avro satışını tamamilə dayandırsalar da, bəziləri müəyyən limit daxilində və ya yalnız öz müştərilərinə dollar satışını davam etdirir. Ümumilikdə banklarda bir nəfər üçün dollar satışına qoyulan limit 100-500 dollar təşkil edir.

8 bank 100 dollar/avro satır

Dollar satan 18 bankdan 8-də günlük satış limiti 100 dollar/avro təşkil edir. “Rabitəbank”, “Zıraat Bank (Azərbaycan)” bir nəfərə gün ərzində 200 dollar və ya 200 avro satır.

“Bank of Baku”dan 300 dollar, 200 avro limiti

“Bank of Baku”dan nisbətən daha çox xarici valyuta əldə etmək olar. Bu bankda günlük limit 300 dollar və 200 avro təşkil edir.

Bu bank 500 manatlıq xarici valyuta təklif edir

“Azərbaycan Beynəlxalq Bankı” isə gün ərzində bir dəfə şəxsiyyət vəsiqəsi ilə 500 manat ekvivalentində dollar və avro satır.

Bəzi banklar günlük olaraq alınan xarici valyutanın həcminə uyğun olaraq satış limitini müəyyən edirlər. Pakistan Milli Bankının Bakı filialından fins.az-a verilən məlumata görə, alışdan asılı olaraq bir nəfər üçün maksimum 500 dollara qədər satış olur. Avro isə ümumiyyətlə satılmır. “Caspian Development Bank” da gün ərzində bir nəfərə 500 dollar satır.

2 bank dollar satsa da, limiti açıqlamır

Bankların bir qismi dollar satışını həyata keçirsələr də, amma limiti açıqlamaqdan imtina edirlər. “Azərbaycan Sənaye Bankı” və “Azər-Türk Bank” dollar və avro satışını həyata keçirdiklərini desələr də, limiti açıqlamayıblar.

Ən çox dollar satan bank – 5 min dollar

Ən çox dollar və avro satan bank “PAŞA Bank”dır. Bankdan fins.az-a verilən məlumata görə, günlük xarici valyuta satışında limit 5 min dollar/avro təşkil edir. Amma bu məbləğ xarici valyuta bankın müştərilərinə satılır.